reginaldlau的主頁

各位好！

Fri, 06 Feb 2009 22:57 EST

突然地想在這裡寫點東西

呵呵！我還在呢！
希望將來還可以有點東西寫在這裡吧
雖然不知道有沒有人看......

如果有那些望穿秋水還在等我寫東西的人
留一留言吧！

祝各位牛年快樂！

Call到攰

Thu, 23 Oct 2008 10:56 EST

有乜理由會有種call客call到攰嘅感覺呢?!~
只怪自已咁夜先做呢件事囉....

聽朝，再努力！

今天，勤力了點

Tue, 21 Oct 2008 12:57 EST

如果日日都好似今日咁就好囉乜嘢海嘯都唔駛驚！仍需努力！

終於都......

Mon, 20 Oct 2008 12:26 EST

要不停的一直走下去
因為，距離目標仲有一條好長嘅路

我個生日party好可能有女歌星出現?!

well，聽住先喇....

多謝各朋友的關心

Sun, 19 Oct 2008 13:24 EST

自從回復「浪子」之身後，收到好多朋友的問候同關心
覺得好溫馨呢~ 多謝各位！

已開始去籌備我嚟緊嘅生日派對
希望到時自己同朋友們都可以玩得開開心心！

今日同同事做咗第一次嘅「豬肉枱」Road Show
雖然成績唔係好好，但總算有case跟
點都好過喺屋企無所事事丫！

繼續努力！

解決了

Thu, 16 Oct 2008 11:55 EST

終於，解決了
回復浪子之身！

在，逃避我嗎

Wed, 15 Oct 2008 12:46 EST

正想開口時，竟然出乎意料地整停咗我
直覺話俾我聽仲係好專登添

聽日內，要解決！

想.....

Tue, 14 Oct 2008 11:49 EST

不排除睇定咗之後有一個決定

真的，呢種感覺真係好討厭！
好似預視咗結局一樣.....

久違了

Mon, 13 Oct 2008 13:25 EST

你好嗎？我久違了的blog

我諗我之後都會經常地喺呢度update自己嘅近況
只因為，應承咗自己！

今日同幾個同事去策劃一個兩個半月嘅計劃
目的，係公司轉咗地方嘅Convention︰北海道﹒札幌
一知道轉咗地方後，動力急升起碼二十倍！
學老細講，唔好諗做唔做到先，起碼要自己起動！
Not Try! DO or NOT DO!!!
我明白架喇！Master Yoda!

同好幾個人呻咗一件事
我明白我係阻止唔到，但只想佢唔好好似我幾年前咁......

和某個結果，今日嘅距離又近咗一大步......

23-25/5 台北魔娘之旅 Day 3

Sat, 07 Jun 2008 03:23 EST

一早起身，有種好耐冇做運動，而突然之間做返攪到自己腰酸骨痛嘅感覺
鬼咩，尋晚係咁「發」，緊係酸喇！

今日臨尾一日，都盡量用盡啲時間周圍行同食
之前聽過話台北嘅KFC比起香港好食好多
所以今日嘅早餐就決定去KFC！
結果.......有點被陰嘅感覺.....都係冇乜分別啫....

check out咗，擺低啲行李喺飯店lobby，就行去西門町掃手信同食嘢
都係鳳梨酥同鴨舌嗰啲喇！

因為佢地尋晚買唔到魔娘嘅嘢，結果就喺西門町一間賣日本嘢嘅地方買佢地嘅寫真集
之後都係去飲吓嘢，同埋食多次阿宗麵線

企喺度食麵嘅文化真係幾得意！

之後就返飯店攞行李再搭國光嘅大巴去機場

哈！喺臨離開台北前都仲埋齋咁毒多我一次
喺我地排隊check in時，有兩個喺台中嚟嘅大學生搵我地做問卷
哈！又會咁得意嘅，排隊嘅人咁多係都偏偏搵我地！呵！

我無意中睇到其中一個嘅學生証，張學生相好靚喎，好似「黑澀會」咁~

好嘞，要上機返香港
為咗去舒緩嗰種返香港嘅失落感
喺返香港途中係攞哂所有買返嚟嘅寫真集睇！
喺機上面發現咗一件有趣嘅事
我地發覺機尾啲空姐係靚過機頭嘅空姐架！(我地係坐機尾)
嗯，下次有機會坐華航嘅時間真係試下可唔可以編去機尾坐先！

唉，好依依不捨呢
希望好快可以再去台北玩就好咯！

23-25/5 台北魔娘之旅 Day 2

Sat, 07 Jun 2008 02:48 EST

其實之前喺LUXY跳咗成晚，理應係好攰先係丫嘛
但我竟然有點瞓唔著，就係因為今日呢個期待以久嘅台北魔娘演唱會

好！Day 2！一行人一早set哂頭就去行吓
毒男們set頭中...

先嚟個早餐︰胡椒餅
呢個胡椒餅真係可以用兩個字嚟形容︰屈機！
真係好好好好食！又足料又熱辣辣！仲係食到最後嗰啖都仲燙手架！

好快，又到午餐時間，又係去咗西門町
去咗一間叫「美觀園」嘅日本餐廳

開頭我地都諗住只係食少少嘢，留定肚再喺西門町入面掃街
但，事與願遺！呢間只係普通門面嘅地方，啲嘢食竟然好食過喺日本嘅地道嘢！
又「屈機」多一次！原本諗住飽五成嘅我，結果飽咗八九成！

吃完之後又兵分三路
有人去101，有人先去concert嘅會場買嘢
而我就跟咗去呢個毒男團嘅第二目標景點︰「萌點女僕餐廳」

因為今次得三個人，所以可以坐出廳
當然感覺上好過Day 1嘅，不過又係唔俾影相....算！
都好，有wifi，可以用部touch上吓網update吓香港有乜事發生
坐到差唔多時間，就出發去會場︰台北南港展覽館

呢個場館都幾遠，喺捷運嘅尾站仲要搭程車先到
個會場好有日本feel呢

去到當然係會合埋班朋友....去排隊買嘢
好慘！竟然預日幾個鐘去排隊，結果買唔到嘢！(好彩宜家可以訂返)

喺場館周圍，都見到好多唔同屆別嘅應援團喺度
最正就係台灣嘅應援團
佢地好好咁自發地攪咗個「螢光棒企劃」
佢地喺場入面每人派兩支螢光棒，一支藍色一支粉紅色
當開場唱Resonant Blue時就舉藍色，喺encore位到完場就舉粉紅色

入到會場，我地就分螢光棒

其實當初我都唔知點解買咁多螢光棒嘅目的係點解
不過真係多得呢啲螢光棒，令之後嘅演唱會好玩好多！

入到場，感覺上係.....細！
唔知呢，以前喺DVD睇佢地嘅concert，個舞台都幾大吓
我真係喺度諗佢地九個人點樣企喺呢個咁細嘅舞台上面呢？
不過都唔理喇，因為要感受一下親身睇魔娘嘅concert嘅氣氛

佢地一出場，全部人舉哂藍色嘅螢光棒，嗰一刻嘅場面真係好感動
呢啲日本味道嘅演唱會真係好正！
繼幾年前喺維園親眼加近距離睇「美勇傳」後
又一次近距離睇佢地嘅表演，仲要係成晚唱哂佢地出道以嚟36隻singles，抵到爛喇！
加上喺日本嚟嘅應援團真係帶到個場一個極好嘅氣氛
同香港嘅fans club真係唔可以比得上！
基本上我地除咗歌與歌之間嗰十數秒嘅嘅時間外，我地係冇坐過咁滯
一路係咁舉螢光棒，成晚好似做咗半年嘅運動量咁
到佢地嘅solo時段，我終於都知道點解我地要買咁多螢光棒！
其實佢地九個每人都有一隻代表色
當佢地出嚟唱solo時，我地就舉佢地隻代表色嘅螢光棒
攪到好忙呢！不過個氣氛真係好正！全個場都係同一隻色嘅螢光棒！
我諗佢地都應該會幾感動！
同埋佢地迎合喺台灣攪演唱會，喺介紹自己時係全部講國語咁滯
不過好攪笑，佢地講國語我真係完全聽唔明，反而佢地講返日文我係明囉！
好可惜個concert入面係唔俾影相....不過我臨尾都偷偷地影咗啲...

佢地喺六月廿八號喺上海又有一個concert
真係好想再去睇多一次.....但我諗都冇呢個機會喇....

之後見大家都跳到舉到好肚餓
就分兩架的士去士林食嘢(哈！又係去士林)
喺食嘢嘅時候都不停咁懷念剛才concert嘅畫面
返到酒店仲要攪個追思會！

原本仲諗住去多晚LUXY
但精神同肉體唔配合，結果超攰咁瞓咗冇去！

呢晚，超滿足！

23-25/5 台北魔娘之旅 Day 1

Sat, 07 Jun 2008 01:28 EST

終於都有點時間寫返之前去台北嘅事
雖然隔咗成幾個星期，但不打緊，因為真係好想記低佢！

================================================

Day 1︰香港=>台北(西門町，台北地下街，士林夜市，LUXY)

因為搭早機嘅關係，所以一朝早八點幾就去到機場
而有兩名團員已經再早啲飛咗過去，所以剩低我地六個毒男起行

吃早餐

心情興奮呢!~

真係呢，去台灣就好似上大陸一樣，個半鐘頭已經到
坐華航，時間上啱啱好睇完一份報紙
哈，華航啲空姐，又真係幾ok喎!~ Well，呢個毒男團一開始就毒咗一吓先！

去到機場，趁排隊過關時，換咗台幣先！
由萬二蚊港幣
變成四萬五千蚊台幣！

出海關時，見到個海關長髮姐姐，Wooh!~ 臨上車前都要毒多你一下！
都唔知我地呢班毒男一出到去見到咁多台灣美媚都唔知點算！

出咗關搭飛狗去酒店

初初喺機場都仲係猛太陽，但係一入到市中心...
落哂雨囉......

返到酒店，打咗電話俾我嘅台灣朋友今晚去LUXY嘅行程後
就去西門町join埋先去到嘅朋友去食嘢

第一次接觸地道嘅台灣食品
真係唔試尤自可，一試就......好好好好好好味呀！！！
尤其係個魯肉飯同埋煎到外脆內軟嘅蘿白糕！香港真係食唔到呢種味！

食完嘢，就分頭行事
買嘢嘅就去買嘢，行街嘅就行街
因為方便聯絡台灣嘅朋友，所以就走咗去開電話咭

好嘞！又一件超毒嘅事件發生！
話說嗰間電話鋪一入去就有個女服務員serve我地
佢一開聲...........WOOOOOOH!~
我真係未試過真身咁聽一個咁嗲嘅台灣妹講嘢再加上我係當堂打咗個冷震！
真係駛唔駛咁CUTE呀！

背住嘅就係剛才所講嘅台灣妹妹
嗱嗱！睇吓Cassie對眼幾兇狠
香港vs台北！FIGHT！

因為冇乜嘢要買，所以就join埋一齊去下一個目的地
亦都係我地呢班毒男團第一個目標景點︰Fatimaid (台北女僕喫茶)
其實我喺香港都去過呢種cafe，講真佢地下下叫我「主人」我都頂唔順
真係唔知嚟到台北呢種cafe係會點

不過可惜喺cafe入面唔俾影啲女僕
同埋我地太多人，被屈入一間房入面......
不過我都已經「大飽眼褔」，仲要係好唔覺意嗰隻添！(Oh Well~)

七件「宅男」！

好嘞，因為之後各團員都各有節目
所以就分開咗兩團玩，其中一團都可算係我帶團嘅
就係士林+LUXY之旅
因為仲有好多時間，所以就返到酒店上「行」戰衣就出發！

第一站︰士林夜市
又一次攻陷我嘅胃部！啲嘢食又係超好食！
尤其係七里香(即係雞pat pat)，真係唔錯！

食完嘢，行咗陣就去另外一個目的地
亦都係我呢個台北之旅首要target︰LUXY
喺未去之前有好多朋友都叫我一定要去，今次真係要見識見識一下！

真係呢，呢個場真係同香港嗰啲係冇得比！
首先入場都平，600蚊台幣(~HKD16x)仲包兩杯drinks
同埋入面個場面真係好靚，樓底又高
加上有Dance Girl同埋Bar Tender嘅噴火表現，正！
好好彩咁呢，原來我其中一個台灣friend係嗰日生日
所以佢地book咗喺舞池前面張枱玩！真係呢，喺台灣識人嘅係真係唔同啲！
仲要係......三男對十女.....好忙啊!~

第一晚，已經玩到好盡興！
但第二晚，仲更加期待！

回來了

Sun, 25 May 2008 13:50 EST

三日兩夜台北之旅，超超超完滿地結束！

要記嘅事實在有太多，要點時間處理一下
遲點再upload上嚟！

今天一個令我憤怒的事

Thu, 22 May 2008 10:37 EST

四川的事....

每次睇到新聞，都有點眼濕濕
見到話有人搶劫物資，假戶口等等，我真係對住個電視爆粗
今日，親歷香港某一少撮青年人嘅白痴及低能！

今日坐小巴返屋企，坐喺我後面嘅兩條「靚」仔喺度傾偈
其中一個問第二個有冇捐錢
答嗰個話︰捐乜x嘢捐呀，我夠慘喇！呢三日攪到我電視又睇唔到，攪嚟都廢！

我相信當時如果我兜心口dup佢嘅話，其餘車上面十三個人加司機一定加入戰團！
坐佢隔離疑似女友嘅物體就鬧佢，叫佢收聲
嗰條死「靚」仔即刻扮哂死狗咁
呢啲人，飛咗佢喇！
嗰陣時好嬲，真係好想打佢！呢條友等天收喇！

==============================================

唔開心事唔好再講
因為，我嘅靈魂已經去咗台北
三日兩夜之「毒到冇朋友電車男8P台北魔娘之旅」，我嚟喇！

極速賽車手 (Speed Racer)

Fri, 16 May 2008 12:03 EST

好耐都冇去睇戲
仲要係難得有人同我去睇 -- 極速賽車手 (Speed Racer)

其實前排喺旺角百老匯出面睇呢套戲嘅trailer
我已經有一個好強烈想睇嘅感覺
喺一個滿懷希望嘅心情下去睇仍然都俾到我驚訝嘅感覺

實在......實在......實在太似Cyfer Formula嘅感覺
架車嘅function，故事嘅情節，亡命嘅賽車比賽
好多part都可以扣到CF嘅嘢
喺鬥車嘅parts中，我知道自己對眼係放大哂呆咗
真係好正好好睇！

有DVD一定買！