5/10/2007

大約5, 6, 7歲左右，阿爸送過一套百獸王超合金畀我，無記錯當時索價百幾，當時算貴架喇，係『新年禮物』，即係過件前會求阿爸送禮物，諗起都好笑，新年唔只買新衫仲買禮物...阿爸又竟然肯買...都幾錫我......

因為阿爸送，好鍾意呢件玩具，但當中亦有一件不愉快事發生......

第二年新年年初一，剛起床，阿爸阿媽已經不停催促我換衫去拜年，我突然發現地下有一粒子彈，係屬於紅、綠獅子的(左右手)，我將佢放回存放子彈同配件既膠袋，個袋係櫃底，我一抽個袋出黎，阿爸阿媽以為我晨早起身玩玩具唔換衫，起勢咁鬧，唔記得有冇打lu，但最後一整包子彈配件都掉左落垃圾筒，我當然喊到七彩，可惜無用...最後都唔畀執返......

成套百獸王玩到甩皮甩骨，d膠既部份有d爛，合金部份甩油，最後至17歲搬屋時掉左......非常非常念舊既我當然好唔捨得...但搬屋搬得太趕急，根本無得畀我諗留定掉...依家每次諗起呢件兒時至寶，心裡都有一D唔愉快既感覺......唔知點形容......

約兩年前，無意中o係屋企附近既屋村商場文具店櫃頂發現一盒外盒算係好完整、全新既百獸王超合金!!! 當時好意外，賣300大元，呢類中古仲要全新既超合金好少有，出面d中古玩具店一定賣得好貴，我豫疑左一陣，由於太大盒無位擺、無位放出黎display又好似浪費左D，最後無買到......直到半年後，間文具店突然結業......開左咁耐既屋村文具店好少執粒......當堂好唔開心...呢件玩具可以勾起好多回憶，心諗點解當時唔買左佢?! 唉......

再過多半年，o係TST玩具反斗城清貨區搵到一款百獸王既KUBRICK公仔，幾得意，可惜缺少左最重要既黑獅子......但都決定買晒4隻先，希望遲D搵埋黑獅子......但到今日為止都未見過呢隻獅子既蹤影......o個4隻完封不動地放o係當日買既膠袋入面.........

 ~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

其實仲有一件好有回憶但唔記得咩卡通既穿梭機超合金，係公公送的，都一早掉左，公公~好掛住你，你離去時我無送你最後一程...對唔住......

 ~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

燈~燈~燈~登~~~~~REEBOK x 百獸王!!!

呢D別注波鞋好多人會覺得攪笑、無聊、唔啦更......但我lunch上網一見到，雙眼即時發光......點解?! 因為每款波鞋配有一隻獅子!!! 仲可以將佢合體成百獸王!!! 波鞋唔係主角，獅子先至係!!!

10月3日J01同I.T.發售，但個價......點買丫......玩具我可能捨得買....但5對波鞋....多左囉...依家d鞋擺到一地都係...仲要幾對未著過...

唉......都係留意一下有冇中古吧......

現在Reebok 以這個風行一世紀的經典動畫作藍本，創造出V-Pack系列，鞋身顏色選用了五款搶眼色彩，代表每一隻獅子的特質個性，以奪目姿態型盡鞋壇！

而最令人心動的是，每款V-Pack還配備一件百獸王玩具：首推的兩款V-Pack系列為黃色及藍色 (即「百獸王．五獅子」之腿)將於10月3 日在J01 和I.T. 獨家發售，而紅色與綠色(即「百獸王．五獅子」之手)將於10月17日接棒登陸，而黑色(即「百獸王．五獅子」之身)將在11月隆重推出，萬勿錯過！

  
Pump Omni Lite (10月3日推出)
靈感來自於黃獅子及其駕駛員青銅強
產品編號：172297
售價：港幣$1,000

 
Ventilator(10月3日推出)
靈感來自於藍獅子及第二任藍獅子駕駛員愛娜公主
產品編號：172296
售價：港幣$700

 
ERS Racer(10月17日推出)
靈感來自於綠獅子及其駕駛員錫石宏
產品編號：172290
售價：港幣$600

 
Insta Pump Fury(10月17日推出)
靈感來自於紅獅子及其駕駛員黑銅勇
產品編號：172295
售價：港幣$1,000

 
Court Victory Pump (11月推出)
靈感來自於‘五獅子’中的黑獅子及隊長兼駕駛員‘黃金旭’
產品編號：172294
售價：港幣$ 900