網誌
2009年11月20日 下午10點16分20秒傳達室的燈光
個多月前的事，到現在還放在心上。這些日子沈澱過來後，我知道我原來還是會很care小時候的事。
上個月的某一天，工作過後，約會之前，閒來無事走到小學處發呆。看看師弟師妹的天真無牙，探望已經所餘無幾，還認識的老師。從十多二十年前到現在還可供憑弔的，大約只剩下現在已經坐不下，那傳達室的小木椅，和那時候可以輕盈地爬進去藍球架下的石鎖王座吧。
校車隊出發，保姆車隊出發，自行回家隊出發，最後是家人接送隊。情況和當年每一天的放學情況無異。在小三以前，我都是家人接送隊的，是最後離校的一批。然而我，是最後的最後。 學校6時放學，會有些同學伴我一起等，一開始大家會興高彩烈的猜皇帝，聊些有的沒的。
但當時針漸漸指著七時，我的同伴也沒有剩下誰。直到校工也離開，只為我留下傳達室的燈光。留下了的我，會坐在三角鐵架放空發呆，會做當時還做到的倒掛金勾。再悶極無聊時，回到傳達室把書包裡的中文、社會、科學課本看一遍再一遍。看課本中的圖片，然後幻想，幻想著我會站到鐘樓的避雷針上，幻想著把學校的孔雀放到南極和企鵝一起玩，我在旁邊堆雪人。幾本書從頭到尾看過了之後，再走到三角鐵架擔天望地。在沒有太多光害的旺區太子，所看到的美麗星空，是後來的人甚難見識得到。但當時我沒有任何要珍惜或浪漫的感覺，那時，我只會覺得害怕，是不是不會有人來接我了，那種很討厭的，會令你鼻子酸了又平靜，然後會因為一些涼意又再發酸的感覺。到後來長大，我明白這感覺叫孤獨。這麼多年以後我已經和他成為老朋友，有點介意他會在不當的時候出現，但也欣喜他總會無條件陪伴。 (是的，縱使如此無聊，我也不會做功課。明天的功課欠交依然。time management從小都是比較差的一環。)
我是愛幻想的人，是本性也是從小開始吧，這免費的娛樂，我每天都有很多很多時間可以在這門子上花費。我喜歡幻想開心快樂的事，喜歡在腦中重溫所聽過、看過的故事，但在微弱的燈光下，我也會想到鬼，想到死亡。一個小二的塞豆窿不會明白死亡是什麼的一回事，但因為不明白的害怕，那種我不再存在了的沒有。會令在大約九時多來接我的爸媽看到我眼紅紅時，以為他們的晚來一點，又令我發脾氣了。其實除了頭一兩次九點之後接送外，我真的沒有再為他們的晚來而哭過了。他們習慣了，我也習慣得了。一次兩次會引起恐慌，但長此以來，一個星期有三、四天是這樣的話，你實在不用怕你沒人接，要等明天上午班有人來時，才會把你發現。
最近情緒有點感冒，縱使明白過去的人生有太多的事不能介懷，但對自己坦白點，每每回憶，我真的還在care。
2005年1月20日 下午5點26分20秒今日去覆診..睇左report...有d野知道左
今日去覆診..睇左report...有d野知道左後個心好銀住銀住......
或者唔駛咁驚，或者所有事都過左去...低處應該都已經過晒去....
原來我曾經有cancer......手術後0既恐怖消息.都會令人好唔舒服...
0黎緊要接受清手尾0既治療，仲有小小甲狀腺未清晒，據講要飲碘水清左佢，另外仲要照核子放射檢查，希望亞醫生無呃我，我真係無晒事.....我只需要定期服藥，之後就咩事都無...
2004年10月21日 下午7點04分53秒我夠竟係邊一形人？連識我咁耐0既blue
我夠竟係邊一形人？連識我咁耐0既blues...都仲未判定我係邊一類形人，不過唔打緊啦，畢竟表相同內在果個，都係好識分開人地注意力0既人。
今日去左魔術店買道具，要教班小朋友上台，唉...我開始更加後悔啦。上到去太郎度搵到要搵0既colouring book，等緊花箱番貨。今個星期，都叫有d野比佢地玩下。不過好快,下星期就最後一堂啦，都唔知點算。想教完整一part上台，似乎都會唔夠時間啦。需然話教得識唔識係佢地0既事，但佢地要上台亞,係上台亞.......好彩0係果度係用羅sir,唔係用亞卡的名義教,.....不過....始終都係我教ga...真係好擔心佢地上台會係點0既樣子。
上到魔術店，我竟然比人盤~~~兜口兜面比人問你玩魔術掂唔掂，呢個時侯，第一時間0既反應就緊係大笑，然後話自己係新人，乜x都唔識，跟住順手做個單手no break double lift等全場冷靜下先，再玩下coins0既反地心吸力。雖然好耐都無出過d魔術shop sosal0者，不過比人咁盤法，真係激返起好耐都無出現過0既死人脾氣...點解會有ko人0既衝動呢？真係唔似平時0既我亞~我不嬲都係風吹山不動0既好脾氣肥仔0黎ga嘛~~一於瀨近排流年不利啦。不過還好，今日玩0既野無失手，唔係就真係瘀死。今日玩完野之後亦睇到我自己同d玩左一兩年魔術0既人果種差距啦。還好，都仲有小小資格比人叫前輩。
blues0係shop度叫人玩人屋樹0既心理遊戲，自己未睇晒notes，只可靠一般0既常識同直覺比意見啦，之後就玩rpg0既問問題，我都將我最近遇到0既問題拎出0黎，睇下人地會點答，好彩d問題都幾中point，有d都可以拎到位姐姐仔0既心理數據。希望之後套人格分析學晒時，又多樣野同人玩啦。
2004年10月19日 下午6點23分36秒今日老豆做大壽，亦係例行玩親戚同
今日老豆做大壽，亦係例行玩親戚同比親戚玩0既日子~~今日終於第一次同我細佬妹唱k。我細妹真係唔講得笑，都真係比個叻佢，一直都知佢有唱開粵曲，但佢今日show quli,一人雌雄同体大合唱，子喉平喉都自己搞掂晒，仲要真係有d功架，玩埋關目同做手。都算係佢才羅彩0既一役。不過細佬就弱左d，把老牛聲真係以為佢去嗌打劫多過唱情歌亞。
而之後同d堂兄弟打牌，點知卡拉ok果邊傳來女聲版f4的唔知咩野，我即刻stun0係度，呢個時候，除左散功同將d牌打到啪啪聲0黎洩憤之外，都無咩正常0既思考情序lor~好彩歌聲呢樣野係地圖炮0黎，呢一連串咁動聽0既就唔止我一個人硬食，結果四家都打到咩章法都唔見晒，成木台人係咁啪啪聲，企圖制造可以令自己心境平和d0既聲音。
有人話卡拉ok係一件偉大0大既發明，正面d睇係可以將忍耐同包容呢幾種美德有所提昇，而另一方面，佢係可以幫你0係唔like0既人面前，可以盡情施刑的特別刑具，死，都唔好孤身上路，一定要攬住一齊死先得過癮0既。
而等到9:00終於開席，席間我好鬼瘦0既細佬不停比人質食菜，當然，我係其中一個幫兇，乜菜都唔食0既細佬，今次食過夠，食到佢眼都有d見反白亞，真係心涼得我丫。
而我細妹亦都有比人質，佢同我d亞叔鬥氣，人地食一舊雞，佢就一碗紅豆沙，食果時都不知幾大殺氣，連我呢個做大佬0既都唔敢講多兩句去潤佢tim ...就0係咁0既情況下，佢個人清左5碗糖水....女人小氣上0黎係幾得人驚的.....
今日老豆識左成50年的老友都有0黎，佢地兩個老友鬼鬼都身體微恙，都要拴住拐杖0黎行，佢0黎都已經非常比面啦。真係戥老豆開心，好朋友仲會0係身邊。希望我60歲時，仲有朋友會到我的生日party啦，50年0既朋友亞，而家我會更努力keep住班friend啦。而我都隔左好耐先見亞世伯0既細仔，真係，咁高大ga啦wor原來，仲高我成個頭亞，之前見佢亞，仲係未到我滕頭亞真係....講得出呢番話，好明顯....我都已經老了.....60歲的我會係點0既我呢？會越0黎越似陳昇？可以keep到謝四哥咁？定係會成為一名咸濕伯父呢？hahahahhahahaha~~~~
2004年10月15日 下午9點58分32秒今日錄返豆鼓0既promo~實在多謝各方友
今日錄返豆鼓0既promo~實在多謝各方友好鼎力相助，有尋找他鄉的、有顏聯武的、有小苦妹的、也有註港高官，甚至誘惑版本都會有~想聽？留意即將播出的uradio新節目，豆鼓新聞啦~~
今日錄完promo，行去搭車返屋企時，竟然發生左好得人驚0既事件，正當我邊行邊聽mp3的時候，我身邊響起很大聱的一聲"啪"，嚇一嚇時望向離我10來cm的地方，竟然係一隻老鼠從天墜地的聲音，而果隻老鼠仲........係未死ga，佢眼仔碌碌咁望住我，仲經過我腳邊急速逃去.....我即時stun左0係度唔知比咩反應，無理由要一個死人麻甩佬通街大嗌嚇返隻老鼠轉頭ga嘛，一個唔好彩擾人清夢，掟落0黎0既就應該唔止老鼠咁細隻同咁軟啦。
本身自己唔算驚老鼠果種人，但係果下sound effect同果種距離，足以令我蒙上青年陰影亞~陰功。
去到旺角已經過左四點，經過細個果時屋企開檔口的一條橫巷，勾起好多好多回憶。曾經身為砵蘭街街童霸皇的我也是有朵的~~hahaha~我五歲就識同人講「見你一鑊就打你一鑊」結果就比人見一鑊就拎出0黎笑一鑊。往日的大小朋友，你們現在會0係邊啦？你們都好嗎？髮型屋的太子爺，皮鞋檔的輝少、大排檔的泰仔、麥榮叔，大中小鳳三姐妹，五金伯伯，商務的大哥哥大姐姐，其中一位姓何的哥哥對我特別好，對經常打書釘我也有說有笑，烘仔都好掛住你地亞~~或者往後，都可能再無見面0既機會，但我一定會記得0係我生命中最開心0既80年代，有你地陪住我一寸一寸咁快高長大。
記得細細個果時，旺角有好多好好食0既食店，就好似江仔記、富記，富記果時好up dup，我第一次去果度食0既時候，係完完全全一d野都唔敢放落肚。仲怨daddy mammy點解帶我去d咁0既地方，但當我食過第一舊雞0既時候，大約就係我開始肥同知道咩野叫好好食0既時候。當初會怨點解要食，而家已經後悔食得太少啦.....到而家，唯一一間有等同份量0既食店只得灣仔同心茶樓，但佢都已經0係2002年0既春天榮休啦。而今日0既旺角....亦已經無野好食啦。
不要以為在砵蘭街行的便沒有好人，那時街坊的義氣，互相照顧睇住，現在的社會已經好難見到啦。幸運的我，在屋村和砵蘭街中長大，令我擁有好多特別0既童年回憶。
買不起相機何需埋怨貧困
就把最美的時光刻在心坎
沒有留下電話號碼是原因
還是成長令朋友淡忘質感
重義氣誰會口說不能
剩幾人可以同苦共甘
人生多遺憾
隨年月倍增