網誌
2005年9月29日 下午12點21分01秒倦死及悶死的一天
29-9-2005 (Thu)
唉...今日係我這個星期最唔想到的日子,因為今日係公司為我地所謂新人攪迎新會喎!真係悶死我呀!一早就要聽佢地講埋晒好多公司既道理及理想,咁當然好啦!原來知道公司有大個理想同系統,咁我係到都好放心同用心啦!但最慘就係今日就係整天都係坐同坐咁啦!仲唔死咩...
加上今日係我第二日好朋友黎揾我,咁我就仲辛苦喇!
辛苦完的一天,終於可以回家喇!!
唔知點解,某人近排好鍾意俾我話佢,一話佢時,佢就會大笑,好開心同享受俾我話,咁唔知大家覺得係佢傻定或是我有問題呢?我真係驚驚呀....
2005年9月29日 下午12點08分42秒整頭的一天
28-9-2005 (Wed)
今日又係番工的日子,由於Sandy今日到佢上堂,所以大部份電話我都要聽,都幾忙啦!又要打番俾D客問佢地星期五到唔到,咁都需要一點時間啦!死咪....
今晚我地五人去阿盈個同事話好既SALON整頭,本來我係打算只係cut hair and make treatment,但係講講下又話有著數如果加埋染,咁我當然順便去染埋啦!今次染得幾好喎!因為我highlight咗紅色,個base做左黑色,都真係唔錯,而且間salon既服務又唔好,髮型師又有禮貌,如果可以的話,都會叫其他人去。大約10:00到啦!我,小敏同美儀無等阿盈同佢同事就走回家喇!我回到家先食野...好肥呀.....
2005年9月27日 下午12點56分07秒好累的一天
27-9-2005 (Tue)
今日算係不用番工,但要去上堂,唔...開心的事就係可以著便服,可以輕鬆一點囉。今日個鬼佬全日都係到講英文,雖然唔係唔話難明,但個問題就係佢個音好似係平架....無咩起伏,你話係唔係真係想死呢?
我就真係好眼瞓囉,好彩都無瞓著。我今日最得著就係可以摸到一駕價值百幾萬既車,真係唔好話唔信呀!人類既頭腦都真係好勁,咩都可以設計係駕車內,你話係唔係攪錯呀!!!
放工學之後,我又去上我自己既英文堂喇!今日真係成日都上堂,人都顛呀!好倦好倦....
2005年9月25日 上午6點07分22秒心情仍是的一天
24-9-2005 (Sat)
本來一直到以為自己瞓醒就可以當甚麼都無事既人,但有時就唔係原此咁堅強。起身後,昨天既唔開心依然存在,不過我同自己講無論點都要開心,因為咁難得係放假,我又出去玩,點可能被這種唔開心既感受所影響呢?
今日我約左珍寶同bonbon睇戲,睇害匙,都可以喎!唔係話太悶,但都唔係話太驚,如果睇都算值得啦!之後我地睇完就行左一陣,最攪笑途中我見到iris佢同佢屋企人一起,我地終於試過係街到碰撞到喇!但都係我發現佢先,佢都係睇我唔到,真攪笑囉....到了食飯時間,我地三個就玩包剪,睇下去邊到食啦!本來係我勝利架!咁就係去食大家樂啦!點知......原來佢地唔鍾意食架!算吧啦!玩我呀!咁當然我無所謂,到最後都係去食杏花樓,都好開心,但我就一路就好似鬧佢地咁,攪到條街既人都望住我地,都幾...ugly架喎!算啦!食完之後,我地就去左旅行社睇去旅行既資料,咁當然就無我份去旅行啦!因為我出年先去呀嘛!之後佢地都陪我等盈盈黎,因為我今晚約左盈盈出黎飲野,傾下計啦!
我今晩好似係咁飲野,因為先同盈盈去仙跡岩,佢食晚飯,我就飲野!但食完晒野後,再行左一陣,我地又話落bar飲野,始終要落到一定會落到。今晚我又試新野飲,我個杯就麻麻地喇!但總算係咁啦!我地俩個今晚傾左好多計,真係好耐都未試過咁呀!好開心呀!多謝盈盈...
係呀!你地不用擔心我,我無事,有你地支持我一定可以好快變番一個好開心的我架!我大個女啦嘛!
2005年9月23日 下午1點40分06秒唔開心的一天
23-9-2005 (Fri)
今日的我完完全全唔知有咩感覺,只係唔開心,當然我內心的痛係無人明白,亦唔需要其他人明白,因為這是我自己的決定,所以我應該自己一個人承擔一切。經過昨晚同佢傾完計時,我知佢而家有幾個女性朋友的出現,雖然佢話無感覺,唔會同佢地一起,但都係一陣的決定。我知我昨晚同佢講既野已經係無得番轉頭,因為我的決定,但又為何當我講完之後,我會咁唔開心呢?我話就算我依然鍾意佢,但我知就算同番佢一起到最後我都係同佢分手,不過事實永遠都係無人知...唉...我個心好痛,但還要係其他人面前裝作無事,我是否太傻呢?但我又可以點做呢?我唔可以同佢講我想同番佢一起,因為我昨晚已經好傷害了他,莫非我還要傷害佢多一次嗎?太殘忍喇!唔好話佢受唔起,就連我都受不起。