2008年8月28日 上午4點06分58秒8 月22 日鸚鵡颱風

今日真係好犀利呀！因為好耐都未試過一個月裏面，有兩日掛八號風球或以上，打工仔額外有多兩日假期休息！幾好呀！呢個颱風仲係香港範圍西貢水域登陸，仲有人影到風眼！真係好特別、好靚！所以我想轉貼出，以方便日後留為回憶，多謝呢位原創人呀！而且今次仲掛埋九號風球！對上一次係 2003 年 9 月 2日，颱風叫「杜鵑」。而我係屋企就冇乜野做，只屋企睇奧運同風暴消息咋！睇新聞陣時，見到大人帶住小朋友去追風，其實佢究竟知唔知，如果萬一咁唔好彩發生什麼意外時，佢會後悔莫及囉！點解宜家人做野之前，唔去想想後果呢？

2008年8月28日 上午2點52分18秒8 月 27 日做修眉同線面

今日隻白色膠錶去改錶帶，嘩！勁平、勁抵只係 5蚊咋！後尾去修眉同線面，呢次係我修幾次眉中最好一次，你知喇！條眉修得唔好，好影響樣嘛！以前修完眉之後實畀人笑，今次就唔同呢！仲有做完線面之後，塊面睇落又白又滑，真係好似脫殼雞蛋咁！超正！

2008年8月26日 上午7點55分52秒蘋果雪梨湯

蘋果雪梨湯

蘋果是一種有益健康的水果，它更是一種天然的減肥食物，中醫學認為蘋果味甘酸、性涼，具有補心益氣，止渴生津，通利腸胃，健脾止瀉的功效。蘋果具有豐富的纖維素，可以促進腸道蠕動，加強排泄，達到幫助減肥的功效。蘋果含有蘋果酸和果膠物質，既可抑制脂肪的形成，又可促進體內脂肪的分解，對防治肥胖有很多的功效。

 

材料：（4人分量）

蘋果（去心）                                     2 個

雪梨（去心）                                     2 個

瘦肉                                                    半 斤

 

做法：

瘦肉冼淨，切件，清水 12 碗和各材料煲 2 小時。

 

功效：

通利腸胃，降脂減肥。

2008年8月25日 上午9點29分06秒8 月 24 日 再去 Disney Land 玩

今日去士尼玩，今次終於可以同米奇、米莉等公仔影相喇，仲有今次可以玩埋 Space Mountain ！真係好開心！而我仲想到多謝陪我玩呢個 game 呢位老友，其實我都知道佢有畏高，但係我諗它裏面黑漆漆咁，佢應該睇唔到任何野，就應該冇問題啦！但當我坐上架車度時，我忽然又好擔心佢會驚喎！佢仲成日嚇我話玩完之後就冇心跳喇！當時根本冇得番轉頭，唯有扮冇事咁留意佢動靜，好彩佢玩緊陣時，佢發出 d 好有規律叫聲，等我知佢無事咋！當玩完 Space Mountain之後大家都“暈陀陀”，行路都行唔到直線。超攪笑！

到Lunch 時，我為報答我呢個冒住生命危險去伴我玩，以及無端端因為冇車位，而要將架車直接駛入Disney Land 停車場好朋友，所以我決定今餐食得豪！就係去 .... 美心飲茶，雖然食物係貴少少，但係我覺得抵過食熱辣辣冇冷氣燒飯囉，因為今日天氣都算熱嘛！我諗過食燒飯話，我每個人都要成 60 蚊喇！如去飲茶每人除番開都係 90 蚊。 所謂「一分錢，一分貨」原則下，我選擇 ... 飲茶，起碼野食好味 d又有冷氣，最少唔會中暑嘛！

令呢個旅程中，唯一有少少遺憾就係睇米奇幻想曲時，我坐得太前喇！變視覺效果差少少，不果我己經好滿足喇！因為我想玩、想睇、想做野全部都做晒喇！超滿足！

到夜晚黑時，我買隻白色膠錶畀自己，另外仲買套水晶玻璃杯送畀朋友做結婚禮物，Perfect！計計 .... 數手指 .... 原來我今日唔計入場卷費用都差唔多用成 1000 蚊呀！大穫！

2008年8月18日 上午10點59分05秒向殉職消防員致敬

早前因為病的關係，所以好耐都未寫過 blog 喇！係我病緊期間，係旺角發生嘉禾大廈的五級大火，當中有兩位消防員殉職，我覺得他們行為真係好偉大呀！他們可以犧性自己的性命去延續他人的生命，呢個做法真係唔係咁多人可以做到，尤其是我地係一個咁現實世界裏，有很多很多人都祗係齋講，到真係發生事情時侯，通常呢 d 人都係第一個唔知跑去邊度？呢事件發生之後，我有一日搭小巴時，聽見電台播緊呢首「愛是不保留」歌，令到諗起呢兩位英雄人物事蹟，所以我特別想用呢首歌向他們作出致敬。