2008年9月20日 下午4點19分41秒補打: 080920--好飽嘅一餐上海菜....

今日同嗰fd去咗官塘間龍如食上海菜

唔知喺咪佢位於工業區無乜人留意, 我哋七點三去到都仲有大把位

但我之前已經訂咗位, 所以就安排咗我哋兩個人坐卡位

入到去...嗰環境唔錯...唔算話好大..但都幾企理吓

佢好似啲酒樓咁...有張菜單比你剔..

我哋就揀咗以下呢啲...

担担麵 (小辣):

酸辣湯

小籠包 (有coupon..所以free嘅)

 

鱔糊炒年糕 (好鬼大碟....)

蜜汁火肪

高力流沙...(即係將豆沙換咗做流沙包入面嘅流沙)

酒釀丸子...(好香酒味)

overall嚟講..啲嘢真係唔錯...工廠區有呢個素質已經好唔錯...

而兩個人食咁多嘢嘅結果...就喺十分之飽...最後唯有將成 2/3碟嘅炒年糕...叫我嗰fd打包拎走..孝敬佢屋企人喇...

 

2008年9月19日 下午2點06分06秒菠菠竟然爆冷....咁快...

之前已經有預告話...菠菠隻演唱會CD會今日出....

佢啲嘢...十居其九都喺有遲無早...我都喺抱住姑且一試嘅心態去信和搵搵...

結果...竟然比我見到...真係10個suprise喇

預佢起碼要多一個禮拜先有...

不過宣傳真係無乜喇...門口連張海報都無...要入到去搵先知出咗..

如果唔入去睇...就錯過喇...

唔知DVD要幾時先肯面世...

 

 

 

2008年9月16日 下午3點21分53秒又嚟敗家喇....

頭先放工去咗德福, 又去到嗰間P字頭嘅麵包店買早餐

呢間嘢啲包都幾貴, 不過勝在好味又軟熟, 可以話喺一分錢一分貨..

今日就用咗差唔多15蚊..買咗呢包一包四塊嘅超厚超熟方包

按落去仲會彈返上嚟...

但就比阿媽話嘥錢...比15蚊佢..佢可以買2磅方包返嚟...

去完德福...就轉咗去淘大...去到淘大..又忍唔住去嗰間輕鬆熊專門店

之後...當然又忍唔住買咗三樣嘢返屋企...

輕鬆熊真係好得意...實在忍唔到手....

唔得....真係要的起心肝儲錢先得吖

2008年9月14日 下午12點39分20秒好鮮奶嘅一日

唔知做乜....屋企買咗好多鮮奶....見唔好嘥...就拎咗嚟做兩款甜品..一整就整咗兩樣...因為都喺好易整嘅...

細嗰兩個喺鮮奶酪...好重鮮奶味架..加埋淡忌廉..又香又滑...配埋粟米片仲一流

大嗰個就喺鮮奶米飯布甸...食落似爆谷加雲呢嗱味..因為我加咗雲呢拿香油..

鮮奶米飯布甸整法  (1-2人份量):

材料:

米                         1湯匙加1茶匙

糖                         1湯匙加1茶匙

鹽                         少許

鮮奶                     240ML

呍呢嗱香油        1/2茶匙

做法:

預熱焗爐150度, 將米, 糖同鹽放喺嗰細嘅焗盆度拌勻, 再加埋鮮奶同呍呢嗱香油拌勻, 之後就可以入爐焗45-60分鐘, 焗嗰陣隔幾個字就拌勻啲材料一次

焗好之後, 攤佢半粒鐘就食得架喇

鮮奶酪 (4杯):

材料:

鮮奶             400ml

糖                 3湯匙

淡忌廉         100ml

魚膠粉         1湯匙半

做法好簡單, 只要將所有材料倒落嗰煲度煮溶哂佢, 再倒落杯仔度, 攤凍之後就可以放入雪櫃三粒鐘度就食得

2008年9月11日 下午2點20分18秒冧酒麵包布甸 ^^

今日心血來潮...整咗幾個冧酒麵包布甸比自己同屋企人嘆...

佢哋個個都話正....冧酒加提子再加埋玉桂...真係香到暈架^^

以後都唔駛等到去酒店食BUFFET先有得食.....

屋企搞掂哂...

材料 (5個份量):

方包           2片

鮮奶           200g

淡忌廉        100g

冧酒            20g

蛋                3隻

糖               60g

提子乾       酌量

玉桂粉      少許

做法:

1. 先將方包去皮, 撕成小片放在可入爐小杯內

2. 將提子放在不銹鋼盆內, 加入冧酒拌勻

3. 再加入玉桂粉在冧酒提子內拌勻, 然後平均地放入小杯內

4. 將蛋打入另一個不銹鋼盆內打成蛋漿, 備用

5. 將鮮奶及糖倒進鍋內, 以慢火將糖煮溶後熄火, 切忌煮滾

6. 將淡忌廉倒進已打好的蛋漿內拌勻

7. 將煮熱的鮮奶倒進忌廉蛋漿內, 期間要不停攪拌, 以免蛋漿遇熱會煮熟

8. 在忌廉漿上舖一張牛油紙, 在不銹鋼盆內放一個篩, 將忌廉漿倒入盆內, 篩和牛油紙的作用是用來隔去雜質的

9. 將篩好的忌廉漿倒進小杯內, 然後放在焗盆上

10. 在焗盆內倒入少許熱水, 再放進已經預熱了150度的焗爐內 (預熱約15分鐘), 再用相同溫度焗30分鐘即成