網誌
2008年3月10日 下午11點07分58秒期待甜品多過主菜嘅一餐
噚晚同個FD去咗旺角嘅風月堂解決晚餐, 佢張信用卡有八折優惠, 甜品又買一送一, 我哋針對甜品呢樣嘢, 就去試咗
等咗唔駛好耐就有位坐, 不過坐嘅地方都幾窄, 喺正兩條柱嘅中間, 出入都有啲難
我同嗰FD order咗個煙肉芝土焗青口, 香辛牛肉奄列蛋飯, 焗芝士帶子海蝦飯(類似咁嘅名), 甜品就order咗個蘋果香蕉薄餅同埋芒果窩夫三文治
青口比我上次食嘅牛油焗帶子惹味, 用嚟舖底用嘅薯蓉都好味, 香辛牛肉飯, 香就夠香, 但真係完全唔辣, 但焗飯就嫌"溜"咗啲
之於甜品, 蘋果香蕉薄餅真係真香, 有時蘋果焗熱咗會變酸, 但呢個就唔會, 我同嗰fd一人一半, 話咁快食哂.
相比之下, 芒果窩夫三文治就失色咗
甜品都等咗幾耐下, 一次如果再食嘅話, 要喺主菜食到一半嗰陣就order定, 唔係會浪費好多時間
呢個芝士煙肉焗青口, 唔錯唔錯
唔辣嘅香辛牛肉蛋飯
"溜"咗啲嘅焗帶子海蝦飯
全晚最好食嘅嘢, 蘋果香蕉薄餅
芒果窩夫, 失望咗啲
2008年3月4日 上午6點38分06秒一間唔錯嘅越南餐廳
噚晚同嗰FD去旺角行完街之後，諗住由女人街尾開始睇有乜嘢食，本來諗住食街尾嗰間新焗嘢嘅，但見要等位，就繼續行前睇仲有乜嘢食
跟住去到一間食越南嘢嘅，睇啲set 好多幾吸引，而且唔駛等位，我就同嗰fd入去試下
我哋order咗個二人set，有越南春卷，咖喱牛腩，菠蘿炒飯，蒜蓉飽再連埋兩盅湯，唔駛加一，埋單103，都算幾抵，啲嘢亦比想像中好食
就喺呢間嘢，近女人街尾（油麻地嗰頭），問嘢幾大間，好易搵
咖喱牛腩都幾香，不過佢辣嘅程度對我同我嗰fd嚟講，只可以話無乜感覺，但勝在夠腍，唔會好似出面有啲牛腩咁，以為自己"o趙" 緊香口膠
而蒜蓉飽就好脆，好香蒜蓉味，不過一人得一塊，唔係好夠喉
呢個喺越式菠蘿炒飯，無菠蘿蓋裝住嘅，裡面有蝦有札肉，都幾好味，不過偏鹹咗少少，唔知喺咪師傅心情唔好，重手咗啲
呢個春卷都夠脆，但油咗啲，配埋生菜食會fresh好多
2008年3月2日 上午4點19分44秒法拉利出埋四座位
法拉利不嬲都喺 "拒絕外母" 型，但今次出咗款新嘅612SCAGLIETTI，可以坐到四個人，不過依然都係 "拒絕外母"，因為後座好窄，只可以坐到兩個小朋友，即係只喺啱爹哋媽咪再加對仔女，"外母"繼續無得坐嘅...
不過成五百萬港幣以上，睇嚟啱啲有錢家庭....
菠菠如果想同熊熊組織返個小FAMILY..可以考慮吓
前面睇
後面睇
側面睇
入面睇
