網誌
2008年11月30日 下午12點46分33秒愛情海嘯
今日本來係好開心嘅星期日..雖然無端端叫咗我去PCCW運動會罰企咗一日企到腳都軟埋,不過諗到收工可以同Cherry去街都當補返數啦,點知就係放工先知賴嘢!!
今日有4個同事去企:我,阿能,駱克機樓I.C.阿豪同Cherry,安排係阿能同阿豪收5:00,我同Cherry收6:00..當我6:10換完衫同Cherry出門口時仲見到阿豪响度等Cherry收工...我即刻諗返起昨日阿豪打來ETT叫我唔好煩住Cherry單嘢..喂,我放假同Cherry飲嘢有乜問題?使唔使得到佢批准??
講返今晚走人,因為我哋要返公司攞下個月更表同埋還返對講機就係一齊返去啦,阿豪同Cherry兩個行到貼晒身有傾有講(差在未拖手同咀埋啫),我就孤零零捧住箱對講機同Cherry對鞋行...我睇到眼冤兼火滾,於是俾返箱嘢俾阿豪:你幫我拎返公司啦,我走先啦!!我攞埋車厘子袋鞋走咗去,佢哋追返上來,為嘅只係一對鞋!?我行遠多少再打俾Cherry質問佢:你依家當我死啊?淨係同佢講嘢得啦!Cherry仲想當冇嘢..我直頭鏟佢啊:你當我傻定白痴啊?明眼人都知你哋搞乜鬼啦!使唔使見到你哋咀埋先知咩事啊?我係好嬲人玩弄我感情啊!我就係問佢:你依家揀要對鞋定要我!?佢話:遲D俾答案我..我唔要拖啊,我話:我要你即刻俾答案!!你想玩到我幾時!?!?!?佢話:對鞋我唔要啦...我叫佢:你即刻同我死出來公司樓下見我!!!
我去到見到佢哋响度,我首先鏟阿豪:我咁大個仔未試過俾人話我煩住女人啊!我放假同邊個飲嘢係我私人事佢冇權過問..我要佢同我道歉,以後唔准干涉我嘅私人嘢同埋攞我同車厘子來講;亦都當面攤佢牌:我由2008年11月30號18:25分開始唔再認識呢位小姐!我警告佢以後都唔准再SMS騷擾我!我呢世都唔會原諒佢玩弄我感情啊!!
2008年11月28日 上午5點28分36秒工作等於挑戰
過去十幾日唔係返工攰到傻就係拍拖要加班,到休息日都唔知夠時間瞓定係夠時間食,電腦又無端端上唔到網,所以到今日先可以寫返Blog~~~唉...
呢排我最Hit嘅動向莫過於去學槍了...話說我星期一中午好平常去食Lunch,一返來拍檔生哥話:Toby打來搵你啊,你覆電話啦...咁我覆電話睇下咩吩咐啦~~~Albert,曾Sir安排你去學槍...下!?!?學槍!?!?我有冇聽錯啊?千真萬確啊...仲要係一連四日返長沙灣公司總部學...咁ETT點啊?Toby話佢會度掂...
星期二早上我抱住不知所措嘅心情返公司訓練學校~~~原來仲有幾個師兄都係俾人踢咗上轎要返來學槍...9:15入課室啦,一班8個同學,有一個係退伍武警,一個係紀部隊出身嘅,另外幾個就好似我咁做保安啦...導師係呂Sir~~~上年做勵敬已經識啦:-)响課室坐咗成朝阿Sir都未來~~~我拎部電腦落街搵地方上網E返相俾樓主(我上個週末跟ETT工程影咗相要俾返樓主報告吧)搞掂返上來先見到呂Sir出現~~~佢話我可以响課室上Wi-Fi交相唔使走來走去~~~唔好咁誇張吧?
Hea咗半日下午終於來料了...我學用嘅係美國雷明登870型手泵推動式入彈獵槍,槍全長40.5吋,未裝子彈槍重係6.5磅;槍管長20吋,光滑槍管冇來福線,子彈管可以容納4發子彈,連同槍管可以裝一發子彈總共可以上5發子彈;所用嘅子彈係公司9號彈(鳥彈)12機柱18mm(1機柱係指一磅鉛球直徑,12機柱係指一磅鉛球分為12等份,一等份係18mm),子彈長2又4分3吋,重1又8分1安士,最遠射程係160碼(146.3米),有殺傷力射程係60碼,危險射程係40碼.子彈發射會向周圍擴散,每10米擴散1呎,即係10米就擴散1呎,20米就擴散2呎...(我依家對咗支槍幾日就梗係背到出來啦,想當時真係唔知講乜)...星期二同星期三都係响學校學洗槍(每次卸彈及交收槍械後都必須檢查槍枝以確保沒有子彈),上彈,退彈及模擬射擊...感覺就好似小朋友玩水槍咁冇乜特別,但係昨日去過槍會燒槍後就完全唔同了...
昨日呂Sir同公司槍房主管Mr.Thapa安排我們去荃灣大帽山嘅香港槍會做實彈射擊練習,8個同學分為兩組,跟返考試模式總共射6發子彈,兩發係試射4發來來真嘅...我安排係第二組,見同學射槍(嘭)一聲都仲唔多覺咩事,到自己企埋位,細心聽呂Sir命令:戴眼鏡耳筒..攞起支槍,洗槍入2發子彈..仲未緊張,Load and ready..(咔咔)聲上彈就意識到咩事啦..用自己時間發射..Check保險掣,上膊,瞇起左眼從後瞄準星望上前瞄準星,右手食指開保險掣,發射(嘭)!嘩...乜真係咁堅啊?個人係感覺到槍柄緩衝膠傳來嘅後座力將個人推了一下,呢一聲就算隔住耳筒都聽得好響(如果冇耳筒肯定震耳欲聾),仲嗅到火藥味啊..我咁大個仔第一次開槍啊~~~本來之前仲有尿意嘅都嚇到冇了..試完2發休息一陣又來過...呢鋪射4發啊..射第一槍個心係卜卜跳,深呼吸再射第二槍時個心就壁卜壁卜跳,又深呼吸再來第三槍..响度諗:幾時射完啊?)到射完第四槍就可以放鬆心情洗槍啦...嘿嘿...
練完槍下午得閒就返ETT行個圈~~~著住公司套獵裝真係唔多自然,因為套衫好似軍人咁款啊,真係想嚇鬼咩?都係換返套西裝好D啊...呵呵...
2008年11月11日 下午12點23分58秒繼續休息
今日仲係放假~~~孖Day多好啊:-)
昨晚同阿姍傾咗三個幾鐘頭電話,成兩點鐘先瞓~~~老友有心事,我一定會幫手分擔呢.
今朝10:00起身~~~凍到我傻啊沖返個熱水涼先,唔食早餐啦,中午去飲茶啦.
同媽咪去元朗大榮華酒樓飲茶~~~叫飯食啊~~~係就係大碟啦,不過味道一般...旨在過茶癮啫..飲完茶媽咪要去買水果,我就行街~~~昨日買嘅證件套大咗D,用來放保安員證就啱...今日想話搵間文具店買套啦,响元朗左行右行結果去大馬路光明書局先買到~~~我N咁耐冇去過嗰頭啊,上一次去應該係今年4月某個夜晚去揍隻貓(我前女友)返天水圍吧..
買完嘢返屋企上網~~~幫車厘子搵相做手機Wall paper...我搵夠31張,有夜景有車相,夠車厘子由1號換到31號天天新款啦~~~哈哈~~~不過男朋友就淨係我一個好啦!
Hea到5:30落街攞返昨日拎去曬嘅Bobby結婚相~~都影得唔錯啦..返來睇一陣新聞就打俾車厘子~~可憐啊!伊人病到幾乎失聲啊:-(梗係啦,車厘子份工雖然時間唔太長,不過要對住電腦工作係好傷神啊,再加上呢排天氣好寒,一早一夜真係好容易僎攝親啊..車厘子俾心機工作啦,遲D夾到大家一齊放假我帶你去飲茶,揼骨,浸腳,食自助餐啦:-)
2008年11月10日 下午1點49分32秒星期一的假期
好耐冇試過星期一放假啊~~~仲要係放孖Day呢:-D真係開心到傻啊!
昨晚返來上網Send返前晚打邊爐D相俾阿姍同Maggie,跟住睇埋Face Book先沖涼瞓覺~~~差唔多2:00先瞓,點知5:10準時凍醒:-(好在記得今日放假,搵返張棉被蓋就繼續大覺瞓:-P
10:30先起身~~~唔使食早餐啦,上網寫返昨日嘅blog就食Lunch~~~中午發生件好開心嘅事:車厘子打來傾偈~~~講返昨晚發生嘅事...正常情侶做嘅嘢啫:-)車厘子覺得好Suprise~~~你接受我呢份Suprise就好啦,我哋開開心心响埋一齊,夾啱時間放假就一齊去街啦:-P
傾完電話坐一陣就落街飲下午茶:-)飲完下午茶就去嘉湖銀座行街~~~Shopping嘅戰利品係:證件套...呵呵...買個套都要行幾條街先搵到.
傍晚6:35打俾車厘子傾電話~~~車厘子仲未好返晒啊,最緊要著夠衫啊,因為我最擔心女朋友唔夠暖同唔夠飽嘛...我想搵次同車厘放假去酒店High Tea,要食藍莓芝士蛋糕,車厘子話我引佢~~~等車厘子好返就真係Plan呢次Trip啊.
2008年11月10日 上午6點38分07秒開心週末
開心週末
啱先兩日週末雖然工作都幾忙,不過就好開心~~~有得擦餐飽啊:-P
Saturday , 8 November,2008
前日返工主要任務係招呼3/F同8/F檢查吊機...阿能放假公司派咗個替假過來擺一日貨仔...好在呢位兄台都肯幫下手,早上一齊收返地毯,坐响大堂都幾精神,我可以安心上樓跟柯打啦..
本來預期半日搞掂Check吊機就下午可以Hea下...點知一搞就係做足一日..朝九晚五,我响3/F同8/F睇公證行職員吊磚試機睇足一日...咁都好,學到專業知識嘛...同樓主交代都講得充分D啦:-)
吊機收完檔我仲要去巡樓~~~前日我巡兩次啊..因為個替假來一日半日一定唔會巡,華姐又唔多熟悉我情願佢响大堂好過啦...阿Paul早咗返來我就早少少走~~~約咗龍門居打邊爐啊.
前晚5個人(我,KK,黃興,周晶晶同阿姍)响友愛酒樓打邊爐~~~我一坐低就隊啤:-P晶晶換咗部Samsung最新出嘅女仔機L708~~~阿姍幫手Set機,我兩部機俾阿姍幫手過歌~~~一時間變咗手機大集會:-)呢餐邊爐每位68蚊任飲任食~~~我哋叫咗好多牛牛啊,丸丸啊,瓜瓜菜菜啊,粉腸啊,魚蝦蟹啊~~~哈哈~~~我就隊咗四罐啤酒:-P~~~到埋單嗰陣阿姍問我有冇醉?我仲行到條直線啊:-D其實我就真係啤啤夫啊...好在阿姍順路送我返屋企樓下啦:-)
Sunday , 9 November,2008
好在仲識準時返工~~~要做發電機大檢啊...我拍梁智蓮同埋阿燐...一早就叫蓮姐上去巡樓:-)AC POWER一早就過來開場~~~今次做機樓,唔使保安跟埋上樓...我同阿燐,蓮姐夾手夾腳換過幾部升降機嘅按掣膠紙~~~因為要用松節水省乾淨舊膠紙跡嘛...下午得閒又見肚餓就叫下午茶返來食:-)年檢一做就係一日~~~AC POWER收完隊我就準備交更...夜更阿龍6:15打返來話仲响深圳未過關??仲以為如果阿能响度或者今晚拍阿Paul可以鬆章...你成日咁搵人老襯我梗係唔肯啦,我叫佢盡快返來,跟手打返公司講啊!!因為昨晚阿Paul放假擺個新人落來一定要阿龍帶佢做嘢嘛...結果個新人就7:10返來,我放蓮姐走先,我就等埋阿龍啦~~~7:50先返到啊:-(我索性出去大家樂食埋飯先返屋企~~~大家樂夜晚幾乎枱枱都係打邊爐~~~變咗火鍋餐廳:-)