網誌
2009年1月12日 下午12點41分09秒2009--隨想
話咁快2009年又過了12日...真係光陰似箭啊..
過去呢排(呢一兩個月啦)我都係返工返到傻了..升了做ETT保安主管算係工作上一個新階段啦,點知遇啱個癡呆樓主,話佢唔好又唔至於真係咁差,佢就硬係貪生怕死,成日自以為是,唔肯虛心學習同唔識人情世固,日常工作的煩瑣雜務就落响我身上...做多D學多D係好啊,最弊好心唔得好報呢..做得OK就冇人知,一個唔好彩有鑊氣就咩都卸落我同幾個拍檔度..唉..我都做到心淡啊..如果唔係念在幾個同事同班承辦商合作愉快我真係唔返呢個場啊..
工作就搞出個病來...今個月本身8日例假,一面心想話放5日剩返3日收O.T.啦,點知就整兩日病假出來...想返都唔得啦,喉嚨痛到出唔到聲.仲有鼻塞同鼻水,返去咪棧得個辛苦...昨日一個唔好彩有同事病逝,一單突發事件就搞到ETT天翻地覆,我後日放完病假仲有返總公司見主管...唉...報又話好報唔報,唔報又話我們遇事不報,咁點先為知係啱啊??I don't Know???
感情事...唉...去年尋尋覓覓兜兜轉轉拍咗3個女仔..以為臨尾可以遇到個OK啦..點知就幾乎做咗笑柄...女方成家人都接受到我(我都未試過一放假就返女家同成家人一齊出出入入,幫手揍小朋友同辦貨啊),最後都係個女仔過唔到自己關口...我都無謂勉強吧,費事白費心機得個吉啊...談情說愛呢家嘢也許唔多適合我吧...你愛人人地未必愛你,愛你又可能變成害你;以為患難見真情,點知最後都係激烈分手...年紀大的唔啱就搵個年紀細啦,又整個程咬金出來仲差D戴綠帽~~~唉~~~真係大整蠱啊!
2009~~~我但求工作順利,身體健康就萬事大吉啦,至於感情事~~~有同冇我都唔在乎了.
南無阿彌陀佛~~~
2008年12月4日 上午4點22分18秒友情勝愛情
我呢幾日雖然面對失戀,不過出奇地好開心啊...冇錯,原來失戀可以係好開心嘅一件事(當然我唔希望再失戀啦~~~哈哈),因為我身邊幾個好朋友實在俾到我太多了.
星期一我照常返工...當時心情當然唔好啦,一返公司就即刻衝上去巡樓,巡完樓早餐都冇心機食,淨係食兩個雞尾包...生哥同清潔阿姐睇得出我唔開心,當然我冇講係為咩事唔開心啦.
巡兩次樓,上MSN就係過去三日嘅生活寫照~~~星期一晚多謝夜更甩轆俾我响公司Stay多三個鐘(Toby話唔知點樣開返O.T.俾我啊)..我收工打俾乖女傾偈~~~佢都估唔到我咁夜先收工..
星期二心情有D好轉~~~多謝大學同學阿Min:-)~~~呵呵~~~星期一同我傾咗成個下午MSN,星期二收工轉登等我兩個鐘頭陪我食飯傾偈(响SOGO門口等阿Min時巧遇我堂家姐Anna)...本來係阿Min開解我,到見面時就係大家好開心咁Sharing~~~咁咪好囉,我明白到愛情唔係生活嘅全部,其實有D好朋友對我仲好過女朋友啊...仲有Sandy啊~~~雖然我同Sandy識咗咁多年都未正式見過面,不過Sandy响MSN講得好啱:車厘子呢單嘢可能係我太偏激,未必真係佢一腳踏兩船嘅,又或者人哋想睇定D,我一下子咁樣要人揀人哋咪索性唔揀囉..不過Anyway,唔揀都揀咗,唔決定都決定咗就乜都唔好諗啦,好好地過去每一日啦..或者可以咁講:如果咁輕易可以放得低車厘子嘅,其實我對佢都唔係真愛得咁交關啫.
昨日..基本上我心態都正常返70%啦...係朝早巡完樓食早餐時有Feel到聽咗千嬅嘅小城大事同我的生存之道~~~呢兩首歌對我都好有感慨啊,話說我前幾年响大陸回流時Hit緊小城大事,咁啱就係嗰年同貓貓拍拖仲要遇到唔少大起大落,我一Down就會聽呢首歌呻下...我的生存之道係貓貓介紹我聽嘅,歌詞寫得好啱:事業還望發展,仍能活著未曾靠諾言...我依家最大心願係做好ETT個場,吸收經驗為將來鋪路啊...昨日上午好清閒,有條傻佬响Lobby唱國歌玩升旗就真係升咗個阿Sir上來Check保安員證~~~哈哈~~~中午去大家樂食完鹽焗雞飯都仲唔飽,等生哥食完飯返來我再去M記食麥樂雞(我係可以餐餐食雞啊)..點知食完嘢返來就做到隻積咁...嘿嘿...昨晚乖女陪我食飯傾偈~~~多謝你啊:-)
今日一覺醒來,窗外溫暖嘅陽光將12月嘅冰冷驅走了,阿女嘅笑聲滋潤咗我嘅心靈(仲甜過昨晚碗紅毛丹西米露啊)...我呢一刻相信友情係珍貴過愛情嘅!!
大家都要知道:情人可能有一日會離開你,不過朋友係可以到永遠啊..
2008年11月30日 下午12點46分33秒愛情海嘯
今日本來係好開心嘅星期日..雖然無端端叫咗我去PCCW運動會罰企咗一日企到腳都軟埋,不過諗到收工可以同Cherry去街都當補返數啦,點知就係放工先知賴嘢!!
今日有4個同事去企:我,阿能,駱克機樓I.C.阿豪同Cherry,安排係阿能同阿豪收5:00,我同Cherry收6:00..當我6:10換完衫同Cherry出門口時仲見到阿豪响度等Cherry收工...我即刻諗返起昨日阿豪打來ETT叫我唔好煩住Cherry單嘢..喂,我放假同Cherry飲嘢有乜問題?使唔使得到佢批准??
講返今晚走人,因為我哋要返公司攞下個月更表同埋還返對講機就係一齊返去啦,阿豪同Cherry兩個行到貼晒身有傾有講(差在未拖手同咀埋啫),我就孤零零捧住箱對講機同Cherry對鞋行...我睇到眼冤兼火滾,於是俾返箱嘢俾阿豪:你幫我拎返公司啦,我走先啦!!我攞埋車厘子袋鞋走咗去,佢哋追返上來,為嘅只係一對鞋!?我行遠多少再打俾Cherry質問佢:你依家當我死啊?淨係同佢講嘢得啦!Cherry仲想當冇嘢..我直頭鏟佢啊:你當我傻定白痴啊?明眼人都知你哋搞乜鬼啦!使唔使見到你哋咀埋先知咩事啊?我係好嬲人玩弄我感情啊!我就係問佢:你依家揀要對鞋定要我!?佢話:遲D俾答案我..我唔要拖啊,我話:我要你即刻俾答案!!你想玩到我幾時!?!?!?佢話:對鞋我唔要啦...我叫佢:你即刻同我死出來公司樓下見我!!!
我去到見到佢哋响度,我首先鏟阿豪:我咁大個仔未試過俾人話我煩住女人啊!我放假同邊個飲嘢係我私人事佢冇權過問..我要佢同我道歉,以後唔准干涉我嘅私人嘢同埋攞我同車厘子來講;亦都當面攤佢牌:我由2008年11月30號18:25分開始唔再認識呢位小姐!我警告佢以後都唔准再SMS騷擾我!我呢世都唔會原諒佢玩弄我感情啊!!
2008年11月28日 上午5點28分36秒工作等於挑戰
過去十幾日唔係返工攰到傻就係拍拖要加班,到休息日都唔知夠時間瞓定係夠時間食,電腦又無端端上唔到網,所以到今日先可以寫返Blog~~~唉...
呢排我最Hit嘅動向莫過於去學槍了...話說我星期一中午好平常去食Lunch,一返來拍檔生哥話:Toby打來搵你啊,你覆電話啦...咁我覆電話睇下咩吩咐啦~~~Albert,曾Sir安排你去學槍...下!?!?學槍!?!?我有冇聽錯啊?千真萬確啊...仲要係一連四日返長沙灣公司總部學...咁ETT點啊?Toby話佢會度掂...
星期二早上我抱住不知所措嘅心情返公司訓練學校~~~原來仲有幾個師兄都係俾人踢咗上轎要返來學槍...9:15入課室啦,一班8個同學,有一個係退伍武警,一個係紀部隊出身嘅,另外幾個就好似我咁做保安啦...導師係呂Sir~~~上年做勵敬已經識啦:-)响課室坐咗成朝阿Sir都未來~~~我拎部電腦落街搵地方上網E返相俾樓主(我上個週末跟ETT工程影咗相要俾返樓主報告吧)搞掂返上來先見到呂Sir出現~~~佢話我可以响課室上Wi-Fi交相唔使走來走去~~~唔好咁誇張吧?
Hea咗半日下午終於來料了...我學用嘅係美國雷明登870型手泵推動式入彈獵槍,槍全長40.5吋,未裝子彈槍重係6.5磅;槍管長20吋,光滑槍管冇來福線,子彈管可以容納4發子彈,連同槍管可以裝一發子彈總共可以上5發子彈;所用嘅子彈係公司9號彈(鳥彈)12機柱18mm(1機柱係指一磅鉛球直徑,12機柱係指一磅鉛球分為12等份,一等份係18mm),子彈長2又4分3吋,重1又8分1安士,最遠射程係160碼(146.3米),有殺傷力射程係60碼,危險射程係40碼.子彈發射會向周圍擴散,每10米擴散1呎,即係10米就擴散1呎,20米就擴散2呎...(我依家對咗支槍幾日就梗係背到出來啦,想當時真係唔知講乜)...星期二同星期三都係响學校學洗槍(每次卸彈及交收槍械後都必須檢查槍枝以確保沒有子彈),上彈,退彈及模擬射擊...感覺就好似小朋友玩水槍咁冇乜特別,但係昨日去過槍會燒槍後就完全唔同了...
昨日呂Sir同公司槍房主管Mr.Thapa安排我們去荃灣大帽山嘅香港槍會做實彈射擊練習,8個同學分為兩組,跟返考試模式總共射6發子彈,兩發係試射4發來來真嘅...我安排係第二組,見同學射槍(嘭)一聲都仲唔多覺咩事,到自己企埋位,細心聽呂Sir命令:戴眼鏡耳筒..攞起支槍,洗槍入2發子彈..仲未緊張,Load and ready..(咔咔)聲上彈就意識到咩事啦..用自己時間發射..Check保險掣,上膊,瞇起左眼從後瞄準星望上前瞄準星,右手食指開保險掣,發射(嘭)!嘩...乜真係咁堅啊?個人係感覺到槍柄緩衝膠傳來嘅後座力將個人推了一下,呢一聲就算隔住耳筒都聽得好響(如果冇耳筒肯定震耳欲聾),仲嗅到火藥味啊..我咁大個仔第一次開槍啊~~~本來之前仲有尿意嘅都嚇到冇了..試完2發休息一陣又來過...呢鋪射4發啊..射第一槍個心係卜卜跳,深呼吸再射第二槍時個心就壁卜壁卜跳,又深呼吸再來第三槍..响度諗:幾時射完啊?)到射完第四槍就可以放鬆心情洗槍啦...嘿嘿...
練完槍下午得閒就返ETT行個圈~~~著住公司套獵裝真係唔多自然,因為套衫好似軍人咁款啊,真係想嚇鬼咩?都係換返套西裝好D啊...呵呵...
2008年11月11日 下午12點23分58秒繼續休息
今日仲係放假~~~孖Day多好啊:-)
昨晚同阿姍傾咗三個幾鐘頭電話,成兩點鐘先瞓~~~老友有心事,我一定會幫手分擔呢.
今朝10:00起身~~~凍到我傻啊沖返個熱水涼先,唔食早餐啦,中午去飲茶啦.
同媽咪去元朗大榮華酒樓飲茶~~~叫飯食啊~~~係就係大碟啦,不過味道一般...旨在過茶癮啫..飲完茶媽咪要去買水果,我就行街~~~昨日買嘅證件套大咗D,用來放保安員證就啱...今日想話搵間文具店買套啦,响元朗左行右行結果去大馬路光明書局先買到~~~我N咁耐冇去過嗰頭啊,上一次去應該係今年4月某個夜晚去揍隻貓(我前女友)返天水圍吧..
買完嘢返屋企上網~~~幫車厘子搵相做手機Wall paper...我搵夠31張,有夜景有車相,夠車厘子由1號換到31號天天新款啦~~~哈哈~~~不過男朋友就淨係我一個好啦!
Hea到5:30落街攞返昨日拎去曬嘅Bobby結婚相~~都影得唔錯啦..返來睇一陣新聞就打俾車厘子~~可憐啊!伊人病到幾乎失聲啊:-(梗係啦,車厘子份工雖然時間唔太長,不過要對住電腦工作係好傷神啊,再加上呢排天氣好寒,一早一夜真係好容易僎攝親啊..車厘子俾心機工作啦,遲D夾到大家一齊放假我帶你去飲茶,揼骨,浸腳,食自助餐啦:-)